Zolai Hong Kipatna

Kum 1886-in Mikang gamah awsuah tawh kituaka laimal gawm ding vaihawm pawl International Phonetics Association kici kiphuan a, Dr. Sweet, Reader in Phonetics, Oxford, in Honorary President sem a, Mr. Daniel Jones in Secretary len hi.

1894 kumin ei nisuahna gam mite lai, pau, ngeina leh tangthu a lunghimawh, a ukteng in Geneva khuapi-ah kikhopna nei-in Congress of Orientalists kici hi. Tua kikhoppina panin nisuahna gam mite pau tawh lai gelhna dingin Mikanglai (Roman script) zat ding phasa uh hi. Tua tawh kisai in Mr. Grant Brown, I.C.S. in hi bangin ci hi: Mikang lai zang ding “kam khat” pen “laimal gawm khat” hisak ding, mipil gamteah zong a kizang thei dingin bawl ding, gam khat peupeuhah kam khat peuhpeuh gelh theih pahpah na’ngin bawl ding, a thei photte in kam khat ol tak manlang taka a sim theih ding uh a bawl ding, lai khetna tawh a kikhet teh sum tawm bei thei thei dinga bawl ding, kampau tawh kisai pilna nei mite in pha a sak uh – Mikanggamteah zong a kizang thei lai leh a phatuam ding, tua teh haksatna khat peuh a om ciang a thu dot ding kampau pilna nei mi pawlkhat committee kibawl leh hoih ding hi ci hi.

Imperial Gazetteer (1900) kici laibupi a gelhpa Sir William Hunter in laimal gawm dan khat nei a, tua pen “Hunter System” kici pahin tu dongin Aizawl gam, Lamka gam, Tedim gam, Falam gam, Haka gam leh Zomite in a bulphuh laiat dan, laigelh zia hong kipatna khat ahi hi. Banghang hiam cih leh, Zogama hong pai masa i sangmangte, i biakna mangte pen Mikang mite hi a, amaute pen i kampau uh lai tawh hong bulhsak masate ahi uh hi.

1912 kumin Royal Asiatic Society kici Mikang gam mahah kiphuan a, Mikang kumpipa mah patron hi pah a, 1904 kuma Linguistic Survey of India kici laibu gelhpa Dr. A. Grierson zong makaipi khatin pang hi. Hih Society in a khet thukizakna July 1912, laimai 647-663 sungah Zopau gelhna dingin Kawllai sangin Mikanglai zat ding kilawm zaw hi cih thu tuang hi.

Chin Hills tawh kisaiin hi hun lai pawl mahin Zolai hong kipan hi. 1898 kumin missionary masapen Rev. Carsonte nupa Haka hong tun hangun lai lam bangmah pan pah thei nai lo uh hi. Carson sih ciangin Rev. Cope 1908 kumin Haka hong tunga, 1910 kumin Tedim ah kikhin hi. Cope in Zogam hong tun a kipanin Zolai gelh zia ding a sin pah hi. Tua hun laiin Chin Hillssung kampau khat peuhpeuh lai kibawl nai lo, lai kikhen nai lo hi. Zomite in kam khat bek zang loin kampau nam tampi tak zang uh hi cih zong kumpi uliante leh makaite (biakna) in thei uh hi. Tua paute khempeuh tawh lai kikhen thei lo a, a zang ding mi zong tawm hi. Tham loin gam khata teng minam khat mah ahih ciangun kampau tampi tawh lai bawl ding pen kumpi a dingin supna hi ding a, Zomite a ding mahin zong lai lam thahat lohna suak ding hi cih mu khin uh hi.

Tua hun laitak mahin bang pau tawh Lai Siangtho tei lehang hoih ding hiam ci-in LS thuvanpipa Rev. W. Sherratt pen Rangoon panin December 1911 in Chin Hills ah va zin hi. A zinna pan a muhna thu London LS saipite zumah a puaknaah Chin Hills a Sub-Division thum, Tedim, Falam leh Haka sung panin Tedim gam a gol pen, a zai pen hi. Zogam sung kumpi uliante leh tua gam sung thu a tel zaw mite ngaihsutna panin kampau tawh kisaiin Tedim gam thupi pen hi: tangkam (lingua Franca) ding vai zong hi gam panin piang dingin ki-ummawh hi ci-in puak hi. Tua mah bangin J.H. Cope in 1913 kumin Matthai bu teikhia hi. Tua pen khat vei puah pha kik laiin March 16, 1914 ciangin a bu in kikhen a, a pau kizatna leh a kiteina khua pansanin Tedim pau (Tedim dialect) cih a tungah kituangsak hi. Tua pen LS saite ciaptehna panin 1915-a kikhen ci-in a mailamah tuangsak uh a, Chin Hills ah LS kikhen masa pen ahi hi.

Mikang kumpite leh Khristian biakna makaite in Chin Hills a tun ciangun Kawllai sang tawmkhat tawh lai pantah uh hi. Ahi zongin a tunga kigen sa bangin Kawllai sangin Mikanglai leh Zolai tawh kipantah masa leh hoih zaw ding hi ci-a Falam khua ah Educational Conference Thukimna 1920-21 pawl in om ngei hi. Tua mah bangin Maymyo ah 1923 October ni 23 niin Chin Education Conference om kik a, tua panin Zopau Zolai tawh sang lai simbu bawl ding thukim kik uh hi. Tua tawh kitonin Rev. Cope pen kumpite in Honorary Inspector of Schools za pia uh a, ama bawlsa laibute 1925 pawlin Chin Hills sangteah hong kizat ciangin tu-a “Zolai” i cihcih uh Mikanglai tawh a kinei Zopau laibute hong piang hi.

Source: Leivui Panin – Autobiography by Rev Khup Za Go